ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱԿԱԿՈՌՈՒՊՑԻՈՆ ԿՈՄԻՏԵԻ ՊԱՏՄՈՒԹՅՈՒՆԸ
Հայաստանի Հանրապետության հակակոռուպցիոն կոմիտեն իրավապահ մարմինների համակարգում նորաստեղծ կառույց է` կազմավորվել և գործում է 2021 թվականի հոկտեմբերի 23-ից` «Հակակոռուպցիոն կոմիտեի մասին» ՀՀ օրենքն ամբողջությամբ ուժի մեջ մտնելու օրվանից:
Հակակոռուպցիոն կոմիտեի կազմավորման, գործունեության, Կոմիտեում ծառայության անցնելու կարգը և պայմանները, պաշտոնների ու դասային աստիճանների դասակարգումը, ծառայողների իրավունքները, պարտականությունները և պատասխանատվությունը, իրավական ու սոցիալական երաշխիքները և Կոմիտեում ծառայության հետ կապված մյուս հարաբերությունները կարգավորվում են «Հակակոռուպցիոն կոմիտեի մասին» ՀՀ օրենքով:
Հակակոռուպցիոն կոմիտեն կազմակերպում և իրականացնում է Հայաստանի Հանրապետության քրեական դատավարության օրենսգրքով իր ենթակայությանը վերապահված՝ ենթադրյալ կոռուպցիոն հանցագործություններով մինչդատական քրեական վարույթը: Իր լիազորությունների շրջանակներում, «Օպերատիվ-հետախուզական գործունեության մասին» օրենքով սահմանված կարգով, նաև իրականացնում է օպերատիվ-հետախուզական գործունեություն:
